Ұлттық археологияның негізін қалаушы, Сарайшық қаласына алғашқы боп археологиялық зерттеулер жүргізген кәсіби археолог, бірегей тұлға Әлкей Хақанұлы Марғұланның тұтынған заттарын, ғалымның қызы Дәнел Әлкейқызы, "Сарайшық" музей-қорығының ғылыми қорына сыйға тартты. Белгілі тарихшы Самат Өтенияздың қолдауымен музей-қорық қызметкерлері А. Тұрарұлы мен А. Жұмабаев Дәнел Әлкейқызымен кездесті. Әлкей Марғұлан қоры бойынша "Сарайшық" музей-қорығында жасалып жатырған жұмыстармен таныстырған қызметкерлерді жылы шыраймен қарсы алған Дәнел Әлкейқызы ғұлама ғалым тұтынған заттар мен жаңадан шыққан кітаптарды музей-қорық қорына сыйға берді. Жаңадан жасақталып жатырған музейлендіру жоспары бойынша Әлкей Марғұлан тұтынған заттар мен жаңа кітаптар алдағы күндері музей экспозициясына қойылады.