«Сарайшық» мемлекеттік тарихи-мәдени музей-қорығы жоспарға сай мектеп оқушыларына арналған «Жан дүние үйлесімі» шеберлік сағатын өткізді. Музей суретші-қалпына келтірушісі О.Кендір келген шәкірттерге қыш бұйым жасау ісінің қыр-сырын әңгімелеп, шеберханасымен таныстырды. Ерекше құлшыныс танытқан шәкірттердің саз балшықты қолымен ұстап, қышкер дөңгелегін айналдырып, алғашқы бұйымдарын жасауға мүмкіндік берді. Сарайшықтың қыш құмыралары мен өзге де бұйымдарынан шабыт алған шәкірттер тылсым өнерге тамсана тарасты.