Биыл – Ауғанстан жерінен Кеңес әскерінің шығарылғанына 35 жыл. Он жылға созылған сұрапыл соғысқа 22 мыңнан астам қазақстандық жауынгер қатысса, оның 4-еуі Сарайшық ауылынан аттанған. Соғыс өртінің сөндіріліп, бейбіт күннің байрағы желбіреген осынау күнге орай «Сарайшық» музей-қорығы арнайы ауған соғысының ардагерлері Шаймарданов Қадірбек, Машихов Рахметолла және марқұм Мақтұмқұлов Жұмажанның зайыбы Қайрошева Зәмзәмен кездесу кешін ұйымдастырды.
Кеш соңында ардагерлер «Сарайшық» музей-қорығына «Ауған соғысындағы атыраулық жауынгерлер шежіресі. 1979-1989» және «Сарайшық сарбаздары» кітаптарын сыйға тартты. Ардагерлер өз естеліктермен бөлісті және кеш патриоттық сайысқа жалғасып, шара соңында сертификаттар табысталды. Өскелең ұрпаққа ерліктің үлгісін көрсеткен ардагерлермен кездесу ерекше әсер қалдырды.
